admin
मुंबई : प्रतिनिधी
आगामी कुंभमेळ्याच्या कामांसाठी नाशिकमध्ये अनेक ठिकाणी खोदाई करण्यात आली असून, याचा नाहक त्रास नागरिकांना सहन करावा लागत आहे. मात्र, धक्कादायक बाब म्हणजे या कामांचे टेंडर गुजरातमधील ठेकेदारांना देण्यात आल्याचा गंभीर आरोप महाराष्ट्र नवनिर्माण सेनेचे अध्यक्ष राज ठाकरे यांनी नुकताच केला आहे. ‘महाराष्ट्रात ठेकेदार पैदा झाले नाहीत का?’ असा संतप्त सवाल उपस्थित करत राज ठाकरेंनी हा आरोप केला. यानंतर राजकीय वर्तुळात जोरदार चर्चा सुरू झाली असून, खरोखरच नाशिक कुंभमेळ्याचे काम गुजराती ठेकेदारांना दिले आहे का, असा प्रश्न विचारला जात आहे. या मुद्द्यावर आता कुंभमेळा मंत्री गिरीश महाजन यांनी राज ठाकरेंना प्रत्युत्तर देत थेट आव्हान दिले आहे.
राज ठाकरेंच्या आरोपांबाबत विचारले असता मंत्री गिरीश महाजन म्हणाले की, राज ठाकरे यांचा काहीतरी गैरसमज झाला आहे. शहरात दीड हजार कोटी रुपयांची कामे सुरू आहेत. मी त्यांना सर्व कामांची यादी देतो, त्यांनी त्या ठेकेदारांची नावे सांगावीत. आउटर रिंगरोडचे तसेच घाटांची कामे सुरू आहेत, मी यादी देतो, त्यात गुजरातचे किंवा परराज्यातील ठेकेदार कोण आहेत, हे त्यांनी स्पष्ट करावे. ऑनलाईन टेंडर कुणीही भरू शकते, तरीही त्यांनी बाहेरचे ठेकेदार कोण आहेत ते पुराव्यासह सांगावे, असे खुले आव्हान महाजन यांनी दिले आहे. यासोबतच त्यांनी नाशिकमधील मनसेच्या मागील सत्तेवरही जोरदार निशाणा साधला.
नाशिक महापालिकेतील मनसेच्या पूर्वीच्या सत्तेवर भाष्य करताना महाजन म्हणाले की, नाशिककरांनी त्यांची सत्ता आणि त्यांचे महापौर पाहिले आहेत. तुमचा कार्यकाळ संपल्यानंतर एकही नगरसेवक निवडून आला नाही. जर तुम्ही नाशिकला खरोखरच इतके सुंदर बनवले होते, तर लोकांनी निवडणुकीत असा निकाल का दिला? माझा त्यांना हा सवाल असून याचे उत्तर त्यांनी द्यावे. त्यांनी नाशिकमध्ये काहीही केले नाही, केवळ मोठ्या-मोठ्या गप्पा मारल्या. जर नाशिकला खरोखरच सुंदर बनवले असते, तर किमान तुमचे दोन-चार नगरसेवक तरी निवडून आले असते. जनतेने एकालाही निवडून दिले नाही, यावरूनच तुम्ही काय काम केले हे स्पष्ट होते, असा सणसणीत टोलाही गिरीश महाजन यांनी लगावला.
