admin
पुणे: पुण्यातील हडपसर परिसरातील एका नामांकित खासगी रुग्णालयात बुधवारी सायंकाळी टायमर बॉम्बसदृश वस्तू आढळल्याने मोठी खळबळ उडाली होती. या प्रकरणाचा तपास करत असताना पुणे पोलिसांनी काही तासांच्या आत एका संशयित आरोपीला ताब्यात घेतले आहे. प्राथमिक माहितीनुसार या आरोपीचे आरोग्य विभागाशी संबंधित कनेक्शन असल्याचे समोर येत असून त्याने हे कृत्य का केले याचा तपास आता पोलीस करत आहेत.
हडपसरमधील उषाकिरण रुग्णालयातील स्वच्छतागृहाजवळ बुधवारी सायंकाळी जिवंत बॉम्बसदृश वस्तू एका व्यक्तीला आढळली होती. रुग्णालयाचे प्रमुख डॉ. विलास गायकवाड यांनी समयसूचकता दाखवत ती वस्तू स्वतः उचलून बाहेरील मोकळ्या जागेत नेली ज्यामुळे मोठा अनर्थ टळला. या वस्तूला सुमारे सात तासांचा टायमर लावलेला होता आणि त्यात जिलेटिनच्या कांड्याही आढळून आल्या होत्या. पुणे पोलीस आणि बॉम्ब शोधक व नाशक पथकाने (BDDS) रात्री उशिरा ही वस्तू सुरक्षितपणे निकामी केली.
पोलिसांनी रुग्णालयातील सीसीटीव्ही फुटेज तपासले असता एक संशयित व्यक्ती इलेक्ट्रिक दुचाकीवरून रुग्णालयात आल्याचे दिसून आले. या व्यक्तीने अतिदक्षता विभागाच्या (ICU) शेजारील स्वच्छतागृहात ही संशयास्पद वस्तू ठेवली होती. या फुटेजच्या आधारे पुणे पोलीस, गुन्हे शाखा आणि एटीएस (ATS) यांनी संयुक्त कारवाई करत संशयित आरोपीला अटक केली आहे. अटकेत असलेला आरोपी आरोग्य विभागाशी संबंधित कामात सक्रिय असल्याचे समजते. त्याने ही वस्तू तिथे का ठेवली आणि त्यामागे कोणाचा कट होता का याबाबत पोलीस सखोल चौकशी करत आहेत. या घटनेमुळे पुण्यातील सार्वजनिक ठिकाणच्या सुरक्षेचा प्रश्न पुन्हा एकदा ऐरणीवर आला आहे.
