admin
परळी वैजनाथ : बीड जिल्ह्याच्या महसूल विभागात शुक्रवारी दुपारी एकच खळबळ उडाली. परळीचे वादग्रस्त तहसीलदार व्यंकटेश मुंडे यांना लाचलुचपत प्रतिबंधक विभागाने (ACB) लाचेची मागणी केल्याप्रकरणी ताब्यात घेतले आहे. ‘सोलंसी’ (ऐपतीचे) प्रमाणपत्र देण्यासाठी त्यांनी तक्रारदाराकडे लाचेची मागणी केली होती.
नेमके प्रकरण काय?
मिळालेल्या माहितीनुसार, एका तक्रारदाराला आपल्या कामासाठी ‘सोलंसी प्रमाणपत्र’ (Solvency Certificate) हवे होते. हे प्रमाणपत्र देण्यासाठी तहसीलदार व्यंकटेश मुंडे यांनी सुरुवातीला ५० हजार रुपयांची लाच मागितली होती. तडजोडीनंतर ही रक्कम २० हजार रुपये देण्याचे ठरले.
सावध तहसीलदार तरीही ‘एसीबी’च्या जाळ्यात
तक्रारदाराने याप्रकरणी बीड एसीबीकडे धाव घेतली. त्यानुसार शुक्रवारी तहसील कार्यालयात सापळा रचण्यात आला होता. मात्र, तहसीलदार मुंडे यांना तक्रारदाराच्या हालचालींचा संशय आल्याने त्यांनी ऐनवेळी पैसे स्वीकारण्यास टाळाटाळ केली. तरीही, एसीबीच्या पथकाने लाचेची मागणी केल्याचे सबळ तांत्रिक पुरावे आणि संभाषणाचे रेकॉर्डिंग आधीच संकलित केले होते. या पुराव्यांच्या आधारे मुंडे यांना ताब्यात घेण्यात आले आहे.
परळीत फटाके फोडून जल्लोष
तहसीलदार व्यंकटेश मुंडे हे त्यांच्या कार्यपद्धतीमुळे आधीपासूनच चर्चेत आणि वादग्रस्त ठरले होते. त्यांच्यावरील या कारवाईची बातमी वाऱ्यासारखी पसरताच परळीतील काही नागरिकांनी तहसील कार्यालयाबाहेर फटाके फोडून आणि पेढे वाटून आनंद व्यक्त केला.
