admin
रत्नागिरी: प्रतिनिधी
राजापूर येथील पत्रकार शशिकांत वारिशे यांच्या हत्येतील मुख्य आरोपी पंढरीनाथ आंबेरकर याला रत्नागिरी सत्र न्यायालयाने सहा आठवड्यांचा अल्पकालीन जामीन मंजूर केला आहे. वैद्यकीय कारणास्तव (मानसिक तणाव आणि आजार) आंबेरकरने केलेल्या अर्जावर अतिरिक्त सत्र न्यायाधीश अनिलकुमार अंबाळकर यांनी हा निकाल दिला.
काय आहे प्रकरण? ७ फेब्रुवारी २०२३ रोजी पत्रकार शशिकांत वारिशे यांचा थार गाडीखाली चिरडून खून करण्यात आला होता. याप्रकरणी पंढरीनाथ आंबेरकरवर भादंवि कलम ३०२ नुसार गुन्हा दाखल करून त्याला अटक करण्यात आली होती. तेव्हापासून तो कारागृहात होता. यापूर्वी त्याचे तीन जामीन अर्ज न्यायालयाने फेटाळले होते.
आरोपीचा युक्तिवाद: आंबेरकरच्या वकिलांनी न्यायालयात सांगितले की, या खटल्यात आतापर्यंत १७ साक्षीदार तपासले गेले आहेत, परंतु त्यांच्या जबाबातून ठोस पुरावा समोर आलेला नाही. केवळ राजकीय पार्श्वभूमीमुळे त्याला गोवण्यात आले असून, या खटल्यामुळे तो प्रचंड मानसिक तणावाखाली आहे. वैद्यकीय अहवालानुसार तो मानसिक आघाताने ग्रस्त असल्याने त्याला उपचारांसाठी जामीन मिळावा, अशी विनंती करण्यात आली.
सरकारी पक्षाचा तीव्र विरोध: तपास अधिकाऱ्यांनी जामिनाला जोरदार विरोध केला. “हा गुन्हा अत्यंत गंभीर स्वरूपाचा आहे. आरोपीचा गुन्हेगारी इतिहास असून उच्च न्यायालयानेही त्याचा जामीन फेटाळला आहे. आरोपी राजकीय वजन असलेला व्यक्ती असल्याने तो साक्षीदारांवर दबाव आणू शकतो किंवा पळून जाऊ शकतो,” असा युक्तिवाद सरकारी पक्षाने केला.
न्यायालयाचे निरीक्षण: दोन्ही बाजूंचा युक्तिवाद ऐकल्यानंतर न्यायालयाने नमूद केले की, आरोप गंभीर असले आणि खटला सुरू असला तरी ‘आरोपी देखील माणूस आहे’ हे लक्षात घेणे गरजेचे आहे. वैद्यकीय कारणास्तव गंभीर गुन्ह्यातही जामीन दिल्याचे दाखले विचारात घेऊन, न्यायालयाने आंबेरकरला कठोर अटींसह सहा आठवड्यांचा (४२ दिवस) जामीन मंजूर केला.
