admin
नाशिक :
वारकऱ्यांचे श्रद्धास्थान आणि ‘प्रति पंढरी’ म्हणून ओळखल्या जाणाऱ्या त्र्यंबकेश्वर येथील श्री संत निवृत्तीनाथ महाराज समाधी देवस्थानचे अध्यक्ष ह.भ.प. राहुल साळुंखे यांच्यावर बलात्काराचा अत्यंत गंभीर गुन्हा दाखल झाला आहे. लग्नाचे आमिष दाखवून एका महिलेवर वारंवार अत्याचार केल्याचा आरोप त्यांच्यावर ठेवण्यात आला आहे. या धक्कादायक घटनेमुळे संपूर्ण आध्यात्मिक आणि सामाजिक वर्तुळात प्रचंड खळबळ उडाली असून, गुन्हा दाखल होताच विश्वस्त मंडळाने साळुंखे यांची अध्यक्षपदावरून तात्काळ हकालपट्टी केली आहे.
मिळालेल्या माहितीनुसार, ह.भ.प. राहुल साळुंखे यांनी लग्नाचे खोटे आमिष दाखवून पीडित महिलेशी जवळीक साधली आणि तिचे वारंवार शारीरिक व लैंगिक शोषण केले. मात्र, काही कालावधीनंतर पीडितेने लग्नाबाबत विचारणा केली असता साळुंखे यांनी उडवाउडवीची उत्तरे देत तिला टाळण्यास सुरुवात केली. आपली मोठी फसवणूक झाल्याचे लक्षात येताच धाडस दाखवत पीडित महिलेने थेट नाशिकमधील इंदिरानगर पोलीस ठाणे गाठून याप्रकरणी सविस्तर फिर्याद दिली. या तक्रारीची गंभीर दखल घेत पोलिसांनी भारतीय न्याय संहितेच्या (BNS) विविध कलमांनुसार साळुंखे यांच्याविरुद्ध बलात्काराचा गुन्हा दाखल केला आहे.
गुन्हा दाखल झाल्याची कुणकुण लागताच कारवाईच्या भीतीने आरोपी राहुल साळुंखे हा पसार झाला असून, नाशिक पोलिसांची विविध पथके त्याचा कसून शोध घेत आहेत. दरम्यान, एका मोठ्या आणि पवित्र आध्यात्मिक देवस्थानच्या अध्यक्षावरच असा गंभीर गुन्हा दाखल झाल्याने भाविकांमधून तीव्र संताप व्यक्त केला जात आहे. या संपूर्ण प्रकरणाची दखल घेत संत निवृत्तिनाथ संस्थानच्या विश्वस्त मंडळाने तातडीची बैठक बोलावली. या बैठकीत सविस्तर चर्चा करून साळुंखे यांच्या हकालपट्टीचा ठराव मांडण्यात आला आणि तो एकमताने मंजूर करत त्यांना अध्यक्षपदावरून बडतर्फ करण्यात आले आहे.
