admin
नागपूर: जिल्ह्यातील स्फोटक कंपन्यांमध्ये मागील अडीच वर्षांत झालेल्या अपघातांच्या आणि त्यातील जीवितहानीच्या घटनांची अत्यंत गंभीर दखल घेत मुख्यमंत्री देवेंद्र फडणवीस यांच्यासमोर ‘रामगिरी’ या शासकीय निवासस्थानी ‘स्फोटके नियम २००८’ संदर्भातील सुधारित मसुद्याचे महत्त्वपूर्ण सादरीकरण करण्यात आले. जिल्हा पोलीस अधीक्षक हर्ष पोद्दार यांच्या नेतृत्वाखालील अभ्यासगटाने तयार केलेल्या या मसुद्यामध्ये भविष्यातील दुर्घटना आणि जीवितहानी टाळण्यासाठी कंपन्यांमध्ये स्वयंचलित (ऑटोमेशन) प्रक्रियेसह सुरक्षेशी संबंधित जागतिक मानकांचा अवलंब करण्याच्या अत्यंत महत्त्वाच्या शिफारसी सुचविण्यात आल्या आहेत. या सादरीकरणाप्रसंगी अभ्यासगटाचे सदस्य, राष्ट्रीय अग्निशमन सेवा महाविद्यालयाचे संचालक ए.आर. सोनटक्के आणि विविध कंपन्यांचे प्रतिनिधी प्रामुख्याने उपस्थित होते. या सुधारित प्रस्तावामध्ये स्फोटकांच्या निर्मिती प्रक्रियेतील मानवी जोखीम कमी करण्यासाठी ही प्रक्रिया जास्तीत जास्त प्रमाणात स्वयंचलित करून तिथे रोबोट्सचा वापर करावा, तसेच प्रत्यक्ष जोखमीच्या ठिकाणी कमीतकमी मनुष्यबळ उपस्थित राहील हे सुनिश्चित करण्यासाठी सुरक्षेशी संबंधित जागतिक मानकांचा आधार घेण्यात यावा, अशा प्रमुख शिफारसींचा समावेश आहे. नागपूर जिल्ह्यातील वारंवार होणाऱ्या अपघातांच्या पार्श्वभूमीवर नियमात आवश्यक सुधारणांचा हा सर्वसमावेशक प्रस्ताव राज्य शासनामार्फत लवकरच केंद्र सरकारला मंजुरीसाठी पाठविला जाणार असल्याचे यावेळी स्पष्ट करण्यात आले.
