admin
नागोया:
भारताची स्टार वेटलिफ्टर मीराबाई चानू हिने अखेर आशियाई क्रीडा स्पर्धेत पदक जिंकण्याचे आपले स्वप्न पूर्ण केले आहे. नागोया येथे सुरू असलेल्या २०२६ च्या आशियाई क्रीडा स्पर्धेत महिलांच्या ४९ किलो वजनी गटात मीराबाईने रौप्यपदक पटकावले आहे. आशियाई क्रीडा स्पर्धेतील तिचे हे पहिलेच पदक आहे.
मीराबाईने स्नॅचमध्ये ८७ किलो आणि क्लीन अँड जर्कमध्ये १११ किलो वजन उचलले. अशाप्रकारे तिने एकूण १९८ किलो वजन उचलून रौप्यपदकावर मोहोर उमटवली. तिच्या या ऐतिहासिक कामगिरीमुळे भारतीय वेटलिफ्टिंगला आशियाई क्रीडा स्पर्धेत तब्बल २८ वर्षांनंतर पदक मिळाले आहे.
या स्पर्धेत उत्तर कोरियाच्या री साँग गुम हिने एकूण २१५ किलो वजन उचलून सुवर्णपदक जिंकले. तर इंडोनेशियाच्या लुलुक डायना त्रि विजायना हिने १९१ किलो वजनासह कांस्यपदक मिळवले.
मीराबाईसाठी हे पदक अधिक खास आहे कारण २०२३ मध्ये चीनमधील हांगझोऊ येथे झालेल्या आशियाई क्रीडा स्पर्धेत तिची पदकाची संधी थोडक्यात हुकली होती आणि तिला चौथ्या स्थानावर समाधान मानावे लागले होते. त्यावेळी दुखापतीमुळे तिच्या कामगिरीवरही परिणाम झाला होता. मात्र, त्यानंतर तिने जोरदार पुनरागमन केले आणि सातत्याने कठोर परिश्रम घेत नागोयामध्ये आपले ध्येय साध्य केले.
भारतीय वेटलिफ्टिंगसाठीही मीराबाईची ही कामगिरी ऐतिहासिक मानली जात आहे. यापूर्वी भारताने १९९८ च्या बँकॉक आशियाई क्रीडा स्पर्धेत वेटलिफ्टिंगमध्ये पदक जिंकले होते. त्यावेळी कर्णम मल्लेश्वरीने भारताला पदक मिळवून दिले होते. आता तब्बल २८ वर्षांच्या प्रदीर्घ प्रतीक्षेनंतर मीराबाई चानूने भारतीय वेटलिफ्टिंगला पुन्हा एकदा आशियाई क्रीडा स्पर्धेच्या मंचावर बहुमान मिळवून दिला आहे.
