admin
मुंबई (प्रतिनिधी):
राज्यात एका बाजूला उन्हाचा चटका वाढत असतानाच आता दुसऱ्या बाजूला अवकाळी पावसाचे संकट उभे ठाकले आहे. भारतीय हवामान विभागाने पुढील ३ ते ४ दिवस राज्याच्या विविध भागांत विजांच्या कडकडाटासह अवकाळी पावसाचा अंदाज वर्तवला असून अनेक जिल्ह्यांना ‘यलो अलर्ट’ जारी केला आहे. हवामान खात्याच्या अंदाजानुसार विदर्भातील नागपूर, वर्धा, चंद्रपूर, अमरावती आणि गडचिरोली या जिल्ह्यांमध्ये पावसाचा जोर अधिक राहण्याची शक्यता असून ताशी ३० ते ४० किलोमीटर वेगाने वारे वाहतील. १४ आणि १५ मार्च रोजी विदर्भात पावसाचा प्रभाव सर्वाधिक राहण्याचा अंदाज आहे.
मराठवाड्यातील छत्रपती संभाजीनगर, जालना, धाराशिव आणि लातूर जिल्ह्यांतही ढगाळ वातावरण राहणार असून तुरळक ठिकाणी पावसाच्या सरी कोसळतील. मध्य महाराष्ट्रातील नाशिक, पुणे आणि नगर जिल्ह्यातही दुपारनंतर हवामानात बदल होऊन पावसाची शक्यता वर्तवण्यात आली आहे. अरबी समुद्रावरून येणाऱ्या बाष्पयुक्त वाऱ्यांमुळे ही स्थिती निर्माण झाली असल्याचे हवामान तज्ज्ञांचे म्हणणे आहे.
सध्या अनेक भागांत रब्बी पिकांची काढणी अंतिम टप्प्यात आहे तर आंबा आणि काजू पिकालाही या अवकाळी पावसाचा मोठा फटका बसण्याची शक्यता आहे. अचानक येणाऱ्या पावसामुळे पिकांचे नुकसान टाळण्यासाठी शेतकऱ्यांनी काढणी केलेला माल सुरक्षित ठिकाणी साठवून ठेवावा आणि शेतीकामांचे नियोजन पावसाचा अंदाज घेऊनच करावे असे आवाहन कृषी विभागातर्फे करण्यात आले आहे.
