admin
कोल्हापूर (प्रतिनिधी) :
कोल्हापूर शहरातील अत्यंत गजबजलेल्या दसरा चौक परिसरात भररस्त्यात एका धावत्या दुचाकीने अचानक पेट घेतल्याची थरारक घटना घडली. दुचाकीस्वाराला गाडी अचानक गरम होऊन त्यातून धूर निघत असल्याचे वेळीच लक्षात आल्याने त्याने तत्काळ गाडी थांबवून बाजूला धाव घेतली. त्यामुळे एका मोठ्या अनर्थापासून बचाव झाला असून सुदैवाने कोणतीही जीवितहानी झाली नाही.
भरदुपारी घडलेल्या या घटनेमुळे परिसरात काही काळ भीतीचे वातावरण निर्माण झाले होते. दुचाकीने पेट घेतल्याचे पाहताच आजूबाजूच्या नागरिकांनी आणि जवळच असलेल्या शोरूमच्या वॉचमनने मदतीसाठी धाव घेतली. स्थानिक नागरिकांच्या सतर्कतेमुळे आणि उपलब्ध असलेल्या अग्निशमन साधनांच्या मदतीने ही आग आटोक्यात आणण्यात यश आले.
मिळालेल्या प्राथमिक माहितीनुसार, ही दुचाकी नवी होती आणि शॉर्ट सर्किटमुळे इंजिनमधून धूर निघून आगीचा भडका उडाल्याची शक्यता वर्तवण्यात येत आहे. भररस्त्यात धडधडणाऱ्या आगीच्या ज्वाळा पाहून प्रवाशांची मोठी धावपळ उडाली होती, मात्र दुचाकीस्वाराने दाखवलेल्या समयसूचकतेमुळे मोठा धोका टळला. सध्या या घटनेची चर्चा संपूर्ण कोल्हापूर शहरात सुरू असून स्थानिक नागरिकांनी वेळीच दाखवलेल्या मदतीचे कौतुक होत आहे.
