admin
कर्नाटक :
कर्नाटकच्या राजकारणात पुन्हा एकदा मोठी खळबळ उडाली आहे. वाल्मिकी विकास महामंडळातील ८९ कोटी रुपयांच्या कथित घोटाळ्याच्या आरोपांवरून राज्याचे नियोजन आणि सांख्यिकी मंत्री बी. नागेंद्र यांनी आपल्या पदाचा राजीनामा दिला आहे. राजीनाम्याची घोषणा करताना नागेंद्र कॅमेऱ्यासमोर अत्यंत भावूक झाले. आपण एक आदिवासी नेता असल्याने आपल्याला जाणीवपूर्वक लक्ष केले जात असल्याचा आरोप त्यांनी रडत रडत केला. सरकारच्या प्रतिमेला धक्का बसू नये म्हणून वरिष्ठ नेत्यांशी चर्चा करून आपण स्वेच्छेने पद सोडत असल्याचे त्यांनी स्पष्ट केले. तसेच, भाजप एका निर्दोष माणसाला गोवत असल्याचा दावाही नागेंद्र यांनी केला आहे.
विशेष म्हणजे, नागेंद्र यांची राजीनामा देण्याची ही दुसरी वेळ आहे. या वर्षाच्या सुरुवातीला याच महामंडळातील ९४ कोटींच्या गैरव्यवहारात नाव आल्यानंतर त्यांनी ‘आदिवासी कल्याण मंत्री’ पदाचा राजीनामा दिला होता. त्यावेळी सीबीआय आणि ईडीच्या अटकेनंतर ते सुमारे तीन महिने तुरुंगात होते. आता पुन्हा या घोटाळ्यावरून भाजप आणि जेडीएसने सरकारविरोधात मोठे आंदोलन आणि १७० किलोमीटर लांबीच्या पदयात्रेचा इशारा दिला होता. विरोधकांनी असाही आरोप केला आहे की, घोटाळ्याची रक्कम तब्बल ६०० खात्यांमध्ये ट्रान्सफर करून ती काँग्रेसने निवडणुकीत वापरली. विरोधकांच्या याच वाढत्या दबावामुळे नागेंद्र यांना अखेर राजीनामा द्यावा लागला आहे.
