admin
रत्नागिरी : दादा जाधव
जिल्ह्यातील विविध शाळांमधील तब्बल २६३ अतिरिक्त ठरलेल्या शिक्षकांची समायोजन प्रक्रिया पुढे ढकलण्याचा निर्णय घेण्यात आल्याचे सायंकाळी झालेल्या बैठकीत ठरविण्यात आले.
यासंदर्भात अधिक वृत्त असे की, गुरुवार दि.१६ एप्रिल रोजी समायोजन प्रक्रिया शिर्के प्रशाला येथे राबविण्यात येणार होती. सदर प्रक्रियेकडे तसेच होणाऱ्या निर्णयाकडे जिल्ह्यातील शिक्षण वर्तुळाचे लक्ष लागले होते. त्या दरम्यान समायोजन प्रक्रीया रद्द करून पुढे ढकलण्यात आल्याने जिल्ह्यात विविधांगी चर्चा घडू लागली आहे. अतिरिक्त ठरलेल्या सदर शिक्षक आणि शिक्षकेतर कर्मचाऱ्यांची यामुळे घालमेल वाढली आहे.
माध्यमिक शिक्षण विभागाने यासंदर्भातील सर्व तयारी पूर्ण केली असताना हरकतींवरील सुनावणी देखील पूर्ण झाली आहे. मात्र पालकमंत्री ना. उदय सामंत यांच्याशी झालेल्या चर्चेमुळे सदरचा समायोजन कार्यक्रम रद्द करण्यात आल्याचे शिक्षण विभागाकडून कळविण्यात आले आहे.
जिल्ह्यातील पटसंख्ये-अभावी अनेक शिक्षक अतिरिक्त ठरले आहेत. यामध्ये अतिरिक्त ठरलेले शिक्षक २६३ असून अतिरिक्त शिक्षकेतर कर्मचारी संख्या १५० इतकी आहे. माध्यमिक खासगी शाळा (रिक्त पदे) ३६९ इतकी आहे. विनाअनुदानित शाळा (रिक्त पदे) २१४ असून एकूण रिक्त पदे ३१५ समायोजन प्रक्रियेचा मोठा फटका जिल्ह्यातील काही शाळांना बसणार आहे.
मिळालेल्या माहितीनुसार, या प्रक्रियेमुळे रत्नागिरी जिल्ह्यातील ९९ शाळा शून्य शिक्षकी होणार आहेत. खाजगी अनुदानित आणि अंशतः अनुदानित माध्यमिक शाळांमधील शिक्षकांचा यात समावेश आहे. समायोजन प्रक्रियेपूर्वी जिल्हाभरातून एकूण २९ हरकती प्राप्त झाल्या होत्या. त्यापैकी काही हरकतींचे जागेवरच निराकरण करण्यात आले. तर उर्वरित १३ हरकतींवर जिल्हा परिषदेच्या माध्यमिक शिक्षण विभागात सुनावणी घेण्यात आली असल्याचे समजते.
