admin
सोलापूर: प्रतिनिधी
सोलापूर महापालिका निवडणुकीच्या (Solapur Municipal Corporation Election 2026) रणधुमाळीला हिंसक वळण लागले आहे. उमेदवारी अर्ज मागे घेण्याच्या शेवटच्या दिवशी (शुक्रवारी) राजकीय वादातून महाराष्ट्र नवनिर्माण सेनेचे (MNS) विद्यार्थी सेना पदाधिकारी बाळासाहेब सरवदे (Balasaheb Sarvade) यांची निर्घृण हत्या करण्यात आली आहे. या घटनेने सोलापूर शहर हादरले असून राजकीय वर्तुळात मोठी खळबळ उडाली आहे.
नेमका वाद काय? मिळालेल्या माहितीनुसार, सोलापूर महापालिकेच्या प्रभाग क्रमांक २ मध्ये उमेदवारी अर्जावरून भाजपच्या (BJP) दोन गटात वाद सुरू होता. या प्रभागात भाजपने शालन शिंदे यांना अधिकृत उमेदवारी दिली होती, तर त्यांच्या विरोधात भाजपच्याच बंडखोर उमेदवार रेखा सरवदे यांनी अर्ज दाखल केला होता. अर्ज मागे घेण्यावरून दोन्ही गटात तणाव निर्माण झाला होता.
या वादात मध्यस्थी करण्यासाठी किंवा रेखा सरवदे यांची बाजू घेण्यासाठी बाळासाहेब सरवदे त्या ठिकाणी उपस्थित होते. यावेळी शाब्दिक चकमकीचे रूपांतर हाणामारीत झाले. हल्लेखोरांनी बाळासाहेब सरवदे यांच्या डोळ्यात कथितरित्या तिखट (चटणी) टाकून त्यांच्यावर तीक्ष्ण हत्यारांनी वार केल्याचे वृत्त आहे. गंभीर जखमी अवस्थेत त्यांना रुग्णालयात नेले असता डॉक्टरांनी त्यांना मृत घोषित केले.
१५ जणांवर गुन्हा दाखल या प्रकरणी जेलरोड पोलीस ठाण्यात भाजपच्या अधिकृत उमेदवार शालन शिंदे यांच्यासह एकूण १५ जणांवर हत्येचा गुन्हा दाखल करण्यात आला आहे. पोलिसांनी काही संशयितांना ताब्यात घेतले असून अधिक तपास सुरू आहे.
मनसे आक्रमक आपल्या पदाधिकाऱ्याची दिवसाढवळ्या हत्या झाल्याने मनसे कार्यकर्ते प्रचंड आक्रमक झाले आहेत. आरोपींना तातडीने अटक करून कठोर शिक्षा करण्याची मागणी मनसेकडून करण्यात येत आहे. शहरात तणावाचे वातावरण असल्याने पोलिसांनी घटनास्थळी मोठा बंदोबस्त तैनात केला आहे.
