admin
संगमेश्वर : प्रतिनिधी
संगमेश्वर तालुक्यात गेल्या दोन दिवसांपासून सुरू असलेल्या मुसळधार पावसामुळे फुणगूस-जाकादेवी मुख्य रस्त्यावरून कोंडये गावाकडे जाणाऱ्या मार्गावर, वगडे फाट्याच्या पुढे एक महाकाय झाड रस्त्यावरच कोसळल्याची घटना घडली आहे. ऐन गर्दीच्या वेळी हे झाड उन्मळून पडल्याने या मार्गावरील संपूर्ण वाहतूक ठप्प झाली असून प्रवाशांसह वाहनधारकांचे मोठे हाल होत आहेत.कोंडये-वगडे फाट्यापुढील हा मार्ग कोंडये मधलीवाडी, दसमवाडी, बौद्धवाडी, वरचा व खालचा मळा, देसाईवाडी तसेच डावखोल, कळकदे आणि कोंडकडे जाण्यासाठी अत्यंत महत्त्वाचा आणि सोयीचा रस्ता आहे. यामुळे या मार्गावर नेहमीच एसटी बसेस आणि खासगी वाहनांची मोठी वर्दळ असते. मात्र, झाड कोसळल्याने हा मुख्य मार्ग पूर्णपणे बंद झाला.वाहतूक खोळंबल्यामुळे प्रवासी आणि विद्यार्थ्यांची गैरसोय टाळण्यासाठी एसटी बस सोयने फाट्यावरून वळवण्यात आली, तर इतर खासगी वाहने सुवरेवाडी अंतर्गत ग्रामीण रस्त्यावरून मार्ग काढत आहेत. प्रशासनाने तात्काळ दखल घेऊन हा वृक्ष रस्त्यावरून हटवावा आणि वाहतूक पूर्ववत करावी, अशी मागणी स्थानिक ग्रामस्थ आणि प्रवाशांकडून केली जात आहे.
