admin
ठाणे : अशोक घाग
विभाग प्रमुख स्व. प्रदीप पुर्णेकर यांच्यावर गोळीबार करून करण्यात आलेल्या निर्घृण हत्येच्या निषेधार्थ आणि शहरातील वाढत्या गुन्हेगारीविरोधात आज ठाण्यात भव्य मोर्चा काढण्यात आला. नागरिकांच्या सुरक्षिततेसाठी आणि ड्रग्ज माफियांवर कठोर कारवाईच्या मागणीसाठी ठाणे महानगरपालिका कार्यालय ते पोलीस आयुक्तालय असा हा धडक मोर्चा काढण्यात आला होता.
ठाणे हे एक सुसंस्कृत आणि ऐतिहासिक शहर म्हणून ओळखले जाते. मात्र, अलीकडच्या काळात शहरात ड्रग्ज माफियांचा सुळसुळाट आणि गुन्हेगारीच्या घटनांमध्ये मोठी वाढ झाली आहे. स्व. प्रदीप पुर्णेकर यांची निर्घृण हत्या ही याच वाढत्या गुन्हेगारी प्रवृत्तीचा एक भयंकर परिणाम असून, या घटनेने संपूर्ण शहरात खळबळ उडाली आहे. शहराच्या लौकिकाला काळिमा फासणाऱ्या या गुन्हेगारी प्रवृत्तींचा तीव्र निषेध करण्यासाठी आणि सर्वसामान्य नागरिकांच्या सुरक्षेचा प्रश्न ऐरणीवर आणण्यासाठी या मोर्चाचे आयोजन करण्यात आले होते.
या मोर्चामध्ये मोठ्या संख्येने नागरिक, पदाधिकारी आणि कार्यकर्ते सहभागी झाले होते. ठाणे महापालिकेपासून सुरू झालेला हा मोर्चा पोलीस आयुक्तालयावर धडकला. शहरात शांतता व सुव्यवस्था अबाधित राहावी, ड्रग्जच्या विळख्यातून तरुणाईला वाचवावे आणि गुन्हेगारांवर पोलिसांचा वचक निर्माण व्हावा, अशी आक्रमक भूमिका यावेळी आंदोलकांनी मांडली. तसेच, ठाणेकरांच्या सुरक्षिततेशी कोणतीही तडजोड खपवून घेतली जाणार नाही, असा कडक इशाराही प्रशासनाला देण्यात आला.
